Елімізде онлайн білім берудің үздіктері анықталды

Көкшетау қаласының гуманитарлық-техникалық лицейі «Үздік Online Mektep-2020» республикалық байқауында топ жарды, деп хабарлайды «Хабар 24». Білім ошағы қашықтан оқытуда озық деп танылған 15 мектептің қатарынан табылды. Ал, ол оқушылар үшін онлайн білім алуға жақсы жағдай жасаған аймақтағы жалғыз мектеп болып отыр. Конкурсты ұйымдастырушылар іріктеу барысында білім саласындағы онлайн платформалардың мұнда қаншалықты кеңінен пайдаланылатынын ескерген. Айта кетейік, аталған мектепте 35 мұғалім жұмыс істейді. 300-ден астам бала білім алады. Ал, олардың барлығы дерлік жеке компьютермен қамтамасыз етілген. Марал Шәменова, гуманитарлық-техникалық лицей-мектебі директорының орынбасары: - Бұл жерде ең басты критерий – осы біздің лицейде қаншалықты қашықтан оқуға жағдай жасалып жатыр, балалардың білім сапасын арттыруда қандай жұмыстар атқарылып жатыр, соның бәрін әлеуметтік желіде жариялап отыру. Бір ай бойы бақылауға алындық. Статистика жүргізілді. Біздің тағы да бір жеңісіміз – республикалық байқауда «Ең үздік лицей» атандық. Бұл жерде лицейде балалармен қаншалықты жұмыс жасалып жатыр, мұғалімдердің қаншалықты осы форумдағы конференцияға қатысып, деңгейінің қаншалықты жоғары екендігі сарапталды.