Ауыл мектептеріне 2 млн теңге сыйақы табысталды

Еліміздегі екі мектеп 2 млн теңгеден сыйақы жеңіп алды, деп хабарлайды «Хабар 24». Алғашқы сертификат Қызылорда облысының Қазалы ауданында орналасқан Ержігіт Бозғұлов атындағы №249 мектеп-лицейіне табысталды. Білім ордасы ауыл оқушыларына арналған «Мың бала» Ұлттық зияткерлік олимпиадасында жоғары нәтиже көрсетіп, 4 мыңнан астам мектеп арасында үздіктер қатарында болған. Сондай-ақ Солтүстік Қазақстан облысы Аққайың ауданының №1 Смирнов орта мектебі де ақшалай сыйақыны иемденді. Білім ошағына «Елбасы медалі» жобасында ең көп медаль бұйырған. Айта кетерлігі, екі жыл ішінде «Елбасы медалі» жобасына ел бойынша 20 мыңнан астам адам қатысты. Олар: спорт, таланттар мен дағдылар, кітап оқу, ұлттық мұра, волонтерлік, экспедициялар мен жорықтар, еңбек тәжірибесі сынды жеті бағытта ізденеді. Айгүл Қуатова, «Елбасы академиясы» КҚ көшбасшылықты дамыту орталығының басшысы: – Солтүстік Қазақстан облысы бойынша барлығы 292 қатысушы қола медаль жеңіп алды. Қазіргі уақытта өңір бойынша «Елбасы медалі» жобасының бағдарламасына 404 жас қатысты. Бұл үлкен жетістік.